kummissjoni zghazagh AD. 1988

Il-kummissjoni żgħażagħ bajdisti ġiet uffiċjalment imwaqqfa fl-1988 minn grupp ta’ ġuvintur li kienu ta’ spiss jifrekwentaw il-każin, dak iż-żmien tal-Banda San Mikiel. Din hi l-ewwel kummissjoni tax-xorta tagħha mwaqqfa f’ Ħaż-Żabbar.

Dawn il-ġuvintur, sa minn dejjem kellhom ix-xewqa li jkabbru l-isem ta’ din is-soċjeta hekk numeruża sew fis-soċi, partitarji u anke ammiraturi minn barra r-raħal. U rnexxielhom għax illum il-ġurnata, kull min hu dilettant tal-festi tradizzjonali maltin, ikun qed jistenna l-marċi ta’ l-aħħar tridu u tat-Te Deum tal-festa tal-Madonna tal-Grazzja biex jammira l-folol kbar ta’ nies jifirħu u jallegraw mal-marċi tal-Banda u biex jara l-Bajdisti x’ għamlu ġdid.

Matul is-snin ...

Din il-kummissjoni ġiet imwaqqfa bl-għan ewlieni li bl-enerġija u l-entużjażmu tagħha, jiġu attirati aktar żgħażagħ lejn is-soċjeta’ mhux biss fi żmien il-festa iżda wkoll matul is-sena kollha. Hi magħmula minn chairperson, segretarju, kaxxier, l-assistenti tagħhom, kuratur tal-maħżen u ħames membri. Ilkoll flimkien jaħdmu biex jigwadanjaw il-flus meħtieġa biex jgħinu lill-każin. Għalhekk jiġu mtella’ diversi okkażjonijiet ta’ fund raising ... kunċerti, ikliet, coffee mornings, parties, iljieli maltin, carshows u ħafna oħrajn. L-attendenza numeruża għal dawn l-attivitajiet tixhed il-professjonalita’ li dejjem ħadmu biha ż-żgħażagħ bajdisti. Impossibli ssemmi lil kull min ta’ sehmu f’ din il-kummissjoni iżda ma nistgħux ninsew lil sħabna Mark Anastasi u Charles Muscat li t-tnejn ħallew din id-dinja qabilna ta’ eta’ kemmxejn żgħira.

Il-festa ...

Bla dubju li kull partitarju jkun qed jistenna b’ ċertu ħerqa l-festa tant għażiża tal-Madonna tal-Grazzja. Sa minn ġimgħatejn wara l-festa ta’ San Mikiel, il-membri eletti tal-kummissjoni jibdew jaħsbu dwar x’ jistgħu jagħmlu ġdid u kif jistgħu jaslu għalih. Tista’ tgħid li din il-kummissjoni kienet il-pijuniera f’ Malta ta’ diversi xogħolijiet artistiċi li llum il-ġurnata jinstabu f’ ħafna mill-festi maltin. L-oriġinalita’ kienet minn dejjem il-pedament ta’ kull proġett għall-festa. Biżżejjed insemmu l-umbrella l-kbira bil-pittura, l-imrewħa ġganteska bil-pittura, il-brimba, il-koppla, il-qarnita,il-kannizzata, il-bandalora u l-monument. Il-faċċata tal-każin hi wkoll xogħol din il-kummissjoni u għada titgawda sal-ġurnata ta’ llum. 

Il-kummissjoni żgħażagħ bajdisti kienet ukoll l-ewwel waħda f’ Ħaż-Żabbar li pproduċiet is-CD tal-kant u set sħiħ ta’ merchandising bil-logos tal-puregreen promotions u bil-figura tal-Madonna tal-Grazzja. Xi snin ilu, din il-kummissjoni, bi qbil mal-kumitat ta’ dak iż-żmien, iddeċidiet li tieħu f’ idejha l-armar tat-toroq. Dan jirrikjedi ħafna ħidma u preparazzjoni iżda bi l-għajnuna t’ Alla illum il-ġurnata din il-kummissjoni tarma madwar għoxrin triq madwar ir-raħal kollu.

Illum ...

Illum il-ġurnata, minkejja li ż-żminijiet inbidlu, il-kummissjoni żgħażagħ bajdisti għada b’ saħħitha u b’ entużjażmu liema bħalu biex tagħti pjaċir liż-żabbarin kolla fil-festa li ġejja, speċjalment lil partitarji numerużi bajdisti. Il-weekender, is-CD, is-souveniers, l-armar tat-toroq, il-brijju tal-festa ... kolla huma impenjattivi biex wieħed jorganizzahom, iżda nassigurakom, li din is-sena, bħas-snin l-imgħoddija, ‘tal-bajda’ se jerġgħu jimpressjonaw .

Grazzi kbira ...

Grazzi kbira tmur lil kull min fis-snin l-imgħoddijja kien parti minn din il-kummissjoni u lil kull min għen biex il-mixja tagħha kienet waħda mimlija suċċessi !!