1.     Isem u Għan

1.1 L-Għaqda hija mqegħda taħt il-Patronċinju tal-Madonna tal-Grazzja u hi magħrufa bl-isem ta’ Għaqda Madonna tal-Grazzja Banda San Mikiel Żabbar A.D. 1883.

1.2         L-emblema tal-Għaqda hija komposta minn żewġ skudetti, bl-ewwel wieħed jirrapreżenta lil Ommna Marija Funtana tal-Grazzji u l-ieħor l-emblema tal-Arkanġlu San Mikiel. Tgħaqqad dawn iż-żewġ skudetti hemm arpa li tirrapreżenta l-mużika. Fuq in-naħa ta’ isfel insibu żigarella bil-kliem ‘A.D. 1883 GĦAQDA MADONNA TAL-GRAZZJA BANDA SAN MIKIEL ŻABBAR’. Idawwar dan kollu nsibu l-weraq tar-rand fuq kull naħa.

1.3         Il-Bandiera tal-Għaqda ġġib l-emblema msemmija f’1.2 u hija mqiegħda fuq sfond aħdar. Fit-tarf tal-bandiera nsibu burdura b’erba’ kantunieri ddisinjati ta’ kulur isfar.

1.4         L-iskop tat-twaqqif tagħha huwa:

1.4.1     It-tagħlim tal-mużika,

1.4.2     Ir-rikreazzjoni tas-soċi,

1.4.3     L-organizazzjoni tal-festa tal-Patruna tagħha, il-festa tal-Madonna tal-Grazzja,

1.4.4     L-organizazzjoni tal-festa tal-Patrun tal-Banda, l-Arkanġlu San Mikiel.

1.5         L-ilsien uffiċjali tal-Għaqda huwa l-ilsien Malti. Ilsna oħra jistgħu jiġu użati jekk u fejn ikun meħtieġ.

2.     Imseħbin

2.1       L-imseħbin ta l-Għaqda Madonna tal-Grazzja Banda San Mikiel huma:

2.1.1   Kumitat Ċentrali

2.1.2   Presidenti Onorarji

2.1.3   Bandisti tal-Post

2.1.4   Bandisti Studenti

2.1.5   Bandisti Onorarji

2.1.6   Membri Sussidjarji

2.1.7   Membri Onorarji

2.1.8   Kummissjoni Banda

2.1.9   Kummissjoni Nar u Armar

2.1.10 Fergħa Nisa

2.1.11 Kummissjoni Żgħażagħ Bajdisti

2.1.12 Kummissjoni Planċier

3.     Kumitat Ċentrali – Direzzjoni

3.1       Il-Kumitat huwa magħmul minn persuni minn 18-il sena ‘l fuq li jiġu magħżula mill-bandisti u l-membri kollha.

3.2       Il-Kumitat għandu jkun kompost minn: President, Viċi President, Segretarju Eżekuttiv, Assistent Segretarju Eżekuttiv, Segretarju Finanzjarju, żewġ Assistenti Segretarji Finanzjarji, Konsulent Tekniku, Direttur Ġenerali, Assistent Direttur Ġenerali, Rappreżentant tal-Banda, Arkivista jew Assistent Rappreżentant tal-Banda, Uffiċjal Relazzjonijiet Pubbliċi, erba’ membri u Direttur Spiritwali.

3.3       L-elezzjoni għall-ħatra ta’ Kumitat Ċentrali għandha ssir billi jitwaħħal avviż fuq in-notice board flimkien mal-karta tal-karigi 15-il ġurnata qabel il-Laqgħa Ġenerali Annwali, sabiex ikunu jistgħu jsiru n-nomini għall-kandidati.

3.4         L-għażla tar-Rappreżentant tal-Banda u tal-Assistent tiegħu issir mill-bandisti stess qabel il-Laqgħa Ġenerali Annwali, waqt il-Laqgħa Annwali tal-Bandisti.

3.5         Id-Direttur Spiritwali jrid jiġi approvat mill-Kappillan tal-Parroċċa ta’ Ħaż-Żabbar.

3.6         Kull nomina ta’ kandidat trid tiġi ffirmata minnu stess, mill-Proponent u mis-Sekondant.

3.7         Jistgħu jiġu proponuti nies għall-Kumitat dawk li jkunu ilhom membri mhux anqas minn sena, kif ukoll bandisti li jkunu ilhom li ħarġu jdoqqu sena jew aktar.

3.8         Wara li jinħatar il-Kumitat Ċrntrali, jinħatru żewġ Reviżuri, Konsulent Legali, u karigi Onorarji jekk ikun hemm.

3.9         Jekk ikun hemm xi riżenja mill-Kumitat, din tiġi mimlija mir-runner-up tal-aħħar Laqgħha Ġenerali. Fil-każ li ma jkunx hemm runner-up, il-Kumitat ikollu dritt li jimla l-vakanza jew vakanzi huwa, wara li jitlob nomini fuq in-notice board.

3.10      F’każ ta’ riżenja ta’ President, Segretarju Eżekuttiv u / jew Segretarju Finanzjarju, trid tiġi mgħajjta Laqgħa Ġenerali biex jimtela l-post vakanti.

3.11      Kull meta jxolji Kumitat, il-membri kollha jaqgħu membri ordinarji.

4.     Kumitat Ċentrali – Dmirijiet u Drittijiet

4.1       Il-President huwa responsabbli tat-tmexxija tal-Għaqda.

4.1.1   Għandu jippresiedi l-laqgħat kollha li jsiru, kemm Ġenerali kif ukoll tal-Kumitat u jara li r-regolamenti qed ikunu mwettqa.

4.1.2   Il-President jista’ jattendi kull laqgħa tal-Kummissjonijiet / Fergħat fi ħdan l-Għaqda.

4.1.3   Għandu jiġi muri lilu dak kollu li għandu x’ jaqsam mal-Għaqda.

4.1.4   Il-President għandu dritt għall-vot f’każ ta’ parita u l-vot tiegħu jkun deċiżiv.

4.2       Is-Segretarju Eżekuttiv huwa fl-obbligu li jżomm minuti tad-deċiżjonijiet li jittieħdu fil-laqgħat tal-Kumitat kif ukoll tal-laqgħat ġenerali, file tal-ittri kollha li jirċievi u kopja ta’ dawk li jibgħat u jżomm reġistru bl-ismijiet u indirizzi tal-bandisti u membri kollha.

4.2.1 Is-Segretarju Eżekuttiv jista’ jattendi f’kull laqgħa li ssir minn kull Kummissjoni / Fergħa fi ħdan l-Għaqda.

4.2.2   Is-Segretarju Eżekuttiv huwa legalment responsabbli minn kull ħaġa li tiġi deċiża kemm mill-Kumitat !entrali, kif ukoll mill-Kummissjonijiet / Fergħat fi ħdan l-Għaqda u kull deċiżjoni li tittieħed minn dawn irid ikollha l-approvazzjoni tiegħu.

4.3       Is-Segretarju Finanzjarju għandu jżomm il-kotba u dokumenti tal-bank jew sigurtajiet tal-bank oħrajn li jista’ jkollha l-Għaqda. Reġistru li fih iżomm id-dħul u l-ħruġ tal-flus bid-dettalji meħtieġa, reġistru ieħor li fih iżomm id-dħul u l-ħruġ iddettaljat ta’ kull programm li jkollha l-banda, kif ukoll reġistru tal-menswalita`.

4.3.1 Is-Segretarju Finanzjarju huwa responsabbli għad-dħul u l-ħruġ u għandu jippreżenta fil-Kumitat rendikont kull 3 xhur u rapport tal-membri regolari. Is-Segretarju Finanzjarju għandu wkoll dawn id-dmirijiet:

4.3.1.1 Kull somma ta’ aktar minn €500 għandu jiddepożitaha fil-bank.

4.3.1.2 Jieħu ħsieb il-ġbir tal-menswalita` jew jiddelega l-Assistenti tiegħu biex jagħmlu dan.

4.3.1.3 Is-Segretarju Finanzjarju għandu jkun preżenti f’kull kwestjoni finanzjarja.

4.3.1.4 Jitlob rendikont finanzjarju tal-Kummissjonijiet / Fergħat meta jara li hemm il-ħtieġa.

4.3.1.5 Kull transazzjoni li ssir fil-banek trid tiġi ffirmata minn mhux anqas minn żewġ uffiċjali minn tlieta.

4.4       Il-President, is-Segretarju Eżekuttiv u s-Segretarju Finanzjarju huma fid-dover li jirrapreżentaw lill-Għaqda b’ mod uffiċjali.

4.5       L-Assistenti ta’ kull Uffiċjal huma fid-dover li jgħinu lill-uffiċjali tagħhom rispettivament u fin-nuqqas tagħhom iridu jagħmlu x-xogħol tal-istess uffiċjali.

4.6       Il-Konsulent Tekniku huwa fid-dover li jagħti pariri siewja lill-Kumitat kull meta jkun meħtieġ u / jew mitlub. Għandu jkun intiż fuq ir-regolamenti tal-Għaqda u dak kollu li jikkonċerna t-tmexxija tal-istess Għaqda.

4.7       Il-Banda hija rappreżentata fil-Kumitat mir-Rappreżentant tal-Banda kif ukoll mill-Arkivista / Assistent Rappreżentant maħtura mill-bandisti stess waqt laqgħa li ssir kull sena qabel il-Laqħa Ġenerali Annwali.

4.7.1   Ir-Rappreżentant huwa fid-dmir li jara l-bżonnijiet tal-banda u li jressaq fil-Kumitat kull disgwid li jista’ jinqala.

4.7.2   Fid-dmir li jżomm reġistru bl-ismijiet tal-bandisti u l-allievi bid-dettalji tagħhom kif ukoll lista ta’ strumenti li jinsabu għand il-bandisti.

4.7.3   Jgħarraf lill-Arkivista b’kull tibdil li jsir mill-istrumenti li jkunu f’idejn il-bandisti jew merfugħa.

4.7.4   Iżomm rendikont tal-attendenza tal-bandisti fil-kunċerti u programmi u jirraporta lill-Kumitat meta xi nuqqasijiet ma jkunux sodisfaċenti għalih.

4.7.5   Jordna lill-bandisti barranin u jgħarraf lill-bandisti bil-ġurnata, il-ħin u l-post, kemm ta’ kunċerti kif ukoll tal-programmi.

4.7.6   Jgħarraf lis-Surmast Direttur b’kull programm li jkollha l-Banda u miegħu jiddeċiedi n-numru ta’ bandisti barranin li jkun hemm bżonn.

4.7.7   Jgħarraf lill-Arkivista bil-mużika li tkun sejra tindaqq biex jieħu ħsieb it-tqassim tagħha.

4.7.8   Ir-Rappreżentant flimkien mal-Arkivista għandhom jieħdu ħsieb li jagħtu xi repo lill-banda skond id-direttivi tal-Kumitat.

4.7.9 Ir-Rappreżentant tal-Banda għandu jimxi mas-Surmast bl-armonija neċessarja u għandu jikkonsulta mas-Surmast fuq l-għażla tal-mużika wara li jkollu l-approvazzjoni tal-Kumitat.

4.7.10 Ir-Rappreżentant għandu jikkonsulta ruħu mal-Kumitat qabel ma jingħata jew jittieħed xi strument kemm lill-bandisti kif ukoll lill-allievi.

4.7.11 Ir-Rappreżentant għandu jressaq lil kull min jitlob biex jitgħallem il-mużika quddiem l-għalliema rispettivi.

4.7.12 Ir-Rappreżentant għandu jikkonsulta mas-Segretarju Finanzjarju fuq xi ħlasijiet li jsiru lill-bandisti.

4.8       Id-Direttur Ġenerali huwa responsabbli għat-tmexxija interna tal-każin.

4.8.1 Id-Direttur Ġenerali huwa fid-dmir li jżomm inventarju ġenerali tal-Għaqda. Kopja ta’ dan l-inventarju għandha tingħata lis-Segretarju u lis-Segretarju Finanzjarju. Dan l-inventarju għandu jinkludi kull propjeta tal-Għaqda b’dak kollu li fiha.

4.8.2   L-Assistant Direttur Ġenerali għandu jassisti lid-Direttur Ġenerali f’dak kollu li jkun hemm bżonn u jassumi r-responsabbiltajiet kollha fin-nuqqas tad-Direttur Ġenerali.

4.9       L-Uffiċjal Relazzjonijiet Pubbliċi għandu jieħu ħsieb il-pubbliċita u l-avviżi kollha neċessarji li jsiru minn żmien għall-ieħor, kemm dawk li jirrigwardaw il-banda kif ukoll attivitajiet oħra. Għandu jieħu ħsieb li jżomm ritratti u materjal ieħor ta’ kull attiva li tiġi mtellgħa mill-Għaqda jew Kummissjonjiet / Fergħat fi ħdanha. Dan il-materjal għandu jinżamm fil-każin.

4.9.1   L-Uffiċjal Relazzjonijiet Pubbliċi għandu jieħu ħsieb il-pubblikazzjoni tar-riviżta annwali li toħroġ għal kull festa tal-Madonna tal-Grazzja (Programm tal-Festa) u s-sit elettroniku uffiċjali www.talgrazzjabandasanmikiel.com

4.10    Il-Membri tal-Kumitat għandhom jgħinu lill-Uffiċjali tal-Kumitat mill-aħjar li jistgħu u kif ikunu ordnati mill-President.

4.10.1 Il-Membri tal-Kumitat għandhom jattendu l-laqgħat kollha tal-Kumitat.

4.11    Ir-Reviżuri (Awdituri) huma fid-dmir li jiltaqgħu kull 6 xhur biex jeżaminaw ir-reġistri tas-Segretarju Finanzjarju u jiffirmawhom jekk isibuhom regolari jew jinformaw lis-Segretarju bil-miktub jekk ikollhom xi dubji.

4.11.1 Ir-Reviżuri huma fid-dmir ukoll li jeżaminaw il-kotba finanzjarji ta’ kull Kummissjoni / Fergħa fi ħdan l-Għaqda. Fiż-żewġ każi jistgħu jagħmlu dan mingħajr avviż minn qabel.

4.11.2 Ir-Reviżuri jridu jiġu konfermati f’kull Laqgħa Ġenerali Annwali.

4.12    Il-Kumitat għandu l-jedd li jaħtar Patruni, Konsulenti, Presidenti Onorarji tal-Għaqda, iżda kull ħatra trid tiġi approvata minn Laqgħa Ġenerali.

4.12.1 Karigi msemmija f’4.11 igawdu l-faċilitajiet kollha li toffri l-Għaqda lill-Membri effettivi, iżda mingħajr dritt għall-vot. Huma ma jistgħux jiġu magħżulin biex jagħmlu parti mill-Kumitat, iżda jistgħu jiġu mistiedna għal xi laqgħat kull meta jiddeċiedi hekk il-Kumitat, waqt li jibqgħu mingħajr dritt għall-vot.

5.     Dmirijiet tal-Kumitat Ċentrali

5.1         Il-Kumitat Ċentrali għandu, mill-inqas, jiltaqa’ darba fix-xahar.

5.2         Is-Segretarju Eżekuttiv għandu minn tal-anqas tlett ijiem qabel kull laqgħa, jinforma lil kull membru tal-Kumitat bid-data u l-ħin tal-laqgħa. L-aġenda trid tkun magħmula mill-President u minnu stess.

5.3         Sabiex il-laqgħa tkun legali, irid ikun hemm attendenza ta’ nofs il-membri u wieħed.

5.4         Jekk xi ħadd jonqos li jattendi l-laqgħat għal tliet darbiet konsekuttivi bla ma jagħti raġuni xierqa, ikun magħdud bħala li spiċċa mill-Kumitat.

5.5         Il-President, is-Segretarju Eżekuttiv u s-Segretarju Finanzjarju jistgħu jieħdu xi deċiżjoni urġenti mingħajr ma jikkonsultaw lill-Kumitat.

5.6         Il-President jista’ jordna laqgħa urġenti jekk iħoss il-ħtieġa.

5.7         Kwalunkwe votazzjoni għandha ssir bil-wiri tal-idejn, iżda kulħadd għandu d-dritt għall-vot sigriet.

5.8         Il-Kumitat għandu s-setgħa jikkowoptja lil kwalunkwe membru / bandist li jidhirlu li jista’ jkun ta’ għajnuna biex iservi f’sotto Kumitat jew Kummissjoni.

5.9         Il-Kumitat ma jistax jiddisponi aktar minn elfejn Ewro (€2000) fuq affarijiet straordinarji matul is-sena mingħajr l-approvazzjoni ta’ Laqgħa Ġenerali. (Il-banda tidħol fl-ispejjeż ordinarji).

5.10      Ħadd ma jista’ jagħmel spejjeż għan-nom tal-Għaqda mingħajr l-ordni tal-Kumitat.

5.11      F’każ ta’ opportunita` ta’ xiri ta’ xi propjeta`, l-uffiċjali għandhom id-dritt li jinnegozjaw mingħajr il-ħtieġa li tingħajjat Laqgħa Ġenerali.

5.12      Kull Uffiċjal li jispiċċa minn kariga jrid jirritorna kull dokument tal-Għaqda li jkollu fil-pussess tiegħu.

5.13      Kull membru li jispiċċa mill-Kumitat, irid jirritorna kull dokument u materjal ieħor marbut mal-Għaqda li jkollu fil-pussess tiegħu.

6.     Il-Membri

6.1         Il-Membri huma dawk kollha (irġiel u nisa) li jħallsu l-menswalita` u li isimhom ikun jidher fil-lista tal-membri ta’ mhux anqas minn tmintax-il sena u ta’ kondotta tajba.

6.2         Dik il-persuna li għal xi raġuni l-Kumitat ma jaċċetahiex bħala membru, ma tkunx tista’ terġa’ tiġi proposta qabel sena. Id-deċiżjoni tal-Kumitat hija finali.

6.3         Il-membri huma fl-obbligu li jhallsu għaxar Ewro (€10.00) fis-sena bħala menswalita` sabiex ikunu jistgħu jibqgħu membri fl-Għaqda.

6.4         Dawk il-membri li jkun lura fil-ħlas għal aktar minn sitt (6) xhur, jiġu avżati mis-Segretarju Finanzjarju bil-miktub u jekk ma jħallsux l-arretrati sa tmint (8) ijiem, isimhom jiġi mħassar mil-lista tal-membri.

6.5         Dawk il-membri li għalqu s-sittin (60) sena sal-31 ta’ Diċembru 2010 u jkunu ilhom membri għal għaxar (10) snin kontinwi, jiġu eżentati mill-menswalita` u jibqgħu igawdu l-istess drittijiet. Dawn jibdew jissejħu bħala Membri Onorarji. Dawk il-membri li jagħlqu s-sittin (60) sena mis-sena 2011 ‘il quddiem, għandhom jibqgħu iħallsu l-menswalita` sal-ħamsa u sittin (65) sena sakemm jibdew jissejħu ‘Membri Onorarji’.

6.6         Ebda membru ma jista’ jgawdi mill-privileġġi kollha tal-Għaqda jekk ikun lura fil-ħlas tal-menswalita` għal aktar minn sitt (6) xhur.

6.7         L-ebda membru effettiv ma jista’ jkun imsieħeb ma’ xi Għaqda Mużikali oħra f’ Ħaż-Żabbar.

7.     Is-Surmast Direttur

7.1         Is-Surmast Direttur tal-Banda jiġi magħżul mill-Kumitat b’konsultazzjoni mal-bandisti tal-post. Deċiżjoni rigward is-salarji u affarijiet oħra jittieħdu mill-Kumitat.

7.2         Is-Surmast Direttur għandu jiddeċiedi meta Alliev ikun wasal biex joħroġ bħala bandist.

7.3         Is-Surmast Direttur jassenja l-parti li għandhom jesegwixxu l-bandisti.

7.4         Is-Surmast Direttur jissuġerixxi n-numru ta’ bandisti barranin li jkun hemm bżonn lir-Rappreżentant tal-Banda.

7.5         Is-Surmast Direttur għandu jagħmel kunċerti skont il-ftehim li jkollu mal-Kumitat u skont il-bżonn tal-Banda.

7.6         Is-Surmast Direttur għandu jirraporta lill-Kumitat b’kull tfixkil li jista’ jkollu.

8.     L-Assistent Surmast

8.1         Il-Kumitat jista’ jaħtar Assistent Surmast biex jgħin lis-Surmast Direttur fit-tmexxija tal-Banda. L-Assistent Surmast, fl-assenza tas-Surmast, iġorr l-obbligi u d-dmirijiet kollha tas-Surmast Direttur.

8.2         Il-Kumitat jista’ jitlob u jiftiehem mas-Surmast Direttur u / jew mal-Assistent Surmast biex jagħtu lezzjonijiet tal-mużika lill-allievi / bandisti. Il-Kumitat jista’ wkoll jaħtar lil ħaddieħor biex jagħti dawn il-lezzjonijiet. Il-ħlas fil-każi kollha jkun miftiehem mal-Kumitat. Skeda bil-ġranet tat-tagħlim għandha ssir bi ftehim mar-Rappreżentant tal-Banda.

8.3         Il-Kumitat huwa fl-obbligu li jitlob lis-Surmast Direttur, Assistent Surmast Direttur jew Għalliem tal-Allievi l-progess ta’ kull alliev / bandist fil-qasam bandistiku.

9.     Il-Bandisti tal-Post / L-Allievi

9.1       Bandisti tal-Post huma dawk li jservu lill-banda mingħajr ħlas.

9.2       Jekk bandist minħabba saħħtu, fuq ċertifikat tat-tabib, jew jiġi mġiegħel mill-Kumitat għall-istess raġuni, ma jkunx jista’ jkompli jagħti s-servizz lill-Banda, dan jibqa’ jgawdi d-drittijiet u privileġġi kollha ta’ bandist sa ħames (5) snin mid-data li fiha t-talba tiegħu tiġi milqugħa mill-Kumitat. Wara dan il-perjodu, din il-persuna titlef biss il-privileġġ li meta tmut tkun akkompanjata mill-Banda. Il-Kumitat iżomm id-dritt Ii juża d-deskrizzjoni tiegħu dwar kull talba, u jekk meta tiġi milqugħa, li jitlob tiġdid ta’ ċertifikat kull meta jħoss il-ħtieġa.

9.3       F’kaz li jiġri dak f’ artiklu 9.2, pero l-bandist ikun ta s-servizz tiegħu mal-Banda għal tletin (30) sena jew aktar, dan għandu jibqa’ jgawdi mill-privileġġi kollha ta’ bandist effettiv.

9.4       Huwa fid-dmir ta’ kull bandist li jattendi għall-kunċerti regolari u għall-programmi li jkollha l-Banda, basta jkun avżat ħmistax-il (15) ġurnata qabel. Bandist tal-Post ma jistax imur idoqq ma’ baned oħra meta l-Banda tagħna jkollha xi servizz, jekk mhux bil-permess tal-Kumitat.

9.5       Il-bandist huwa fid-dmir li jieħu ħsieb l-istrument li jkun fdat f’idejh u għandu jagħti sodisfazzjon lir-Rappreżentant tal-Banda meta dan jonqos mid-dover tiegħu.

9.6       Il-Bandist jew l-Alliev huwa responsabbli għall-istrument Ii jiġi mogħti lilu u għandu jirritornah meta jkun mitlub, f’kundizzjoni tajba lill-Kumitat u għandu jkollu xi ħadd garanti meta dan ikun taht it-tmintax-il (18) sena.

9.7       Il-bandist għandu jkollu permess mir-Rappreżentat biex juża l-istrument għal servizzi barranin u jrid jigarantixxi l-propjeta li jkollu f’idejh tal-Għaqda.

9.8       Meta bandist iħalli l-Banda u fl-istess ħin jibqa’ jdoqq ma’ baned oħra lokali, sabiex jerġa’ jiġi ammes fl-Għaqda, irid jiġi approvat mill-Kumitat u mil-Laqgħa Ġenerali tal-Bandisti.

9.9       Meta bandist iħalli lill-Banda u fl-istess ħin jibqa’ jdoqq ma’ baned oħra bħala bandist barrani, ma jistax ikun membru sussidjarju.

9.10    Ebda bandist li jħalli l-Banda ma jista’ jibqa’ bħala membru sussidjarju jekk il-kawża iegħu ma tissodisfax lill-kumitat.

9.11    Kull min ikun jixtieq li jitgħallem xi strument mużikali bil-għan li jissieħeb mal-Banda San Mikiel, ikun jrid jimla applikazzjoni li tkun approvata mill-Kumitat. Jekk l-Alliev ikun għalaq it-tmintax-il (18) sena, l-applikazzjoni timtela minnu stess. Jekk ikollu anqas minn tmintax-il (18) sena, l-applikazzjoni timtela u tiġi ffirmata minn wieħed mill-ġenituri jew persuna legalment responsabbli minnu.

9.12    Kull alliev li jaċċetta li jitgħallem l-mużika mal-Banda, irid jintrabat li jagħti minn tal-inqas 3 snin servizz b’xejn lill-Banda tagħna bħala ħlas għat-tagħlim Ii jkun ingħata.

9.13      Il-Kumitat għandu dritt Ii jitlob l-istrument tal-Banda lura mingħand kull bandist li ma jkunx qiegħed juri interess fil-Banda.

10. Laqgħat Ġenerali / Straordinarji

10.1      Għandhom isiru dawn il-Laqgħat Ġenerali:

10.2      F’Awissu sabiex jiġu nformati s-soċi x’parti sejra tieħu l-Għaqda u l-Banda fil-festa tal-Madonna tal-Grazzja kif ukoll biex jinqara r-Rendikont Finanzjaru tas-sitt (6) xhur.

10.3      F’Ottubru biex jinħatar Kumitat ġdid għas-sena ta’ wara, il-qari tar-Rendikont Finanzjarju tat-tieni sitt (6) xhur tas-sena kif ukoll ir-Rapport Amministrattiv.

10.4      Kull meta l-President u l-Kumitat jidrilhom li m’għandhomx jieħdu deċiżjoni weħidhom.

10.5      Laqgħa Ġenerali Straordinarja issir meta terz (⅓) tal-membri regolari japplikaw bil-miktub lis-Segretarju u juru l-ħtieġa tat-talba tagħhom.

10.6      Il-President wara li jkun stħarreġ u ddiskuta din it-talba mal-Uffiċjali tiegħu, u jara li hija talba valida, huwa fid-dmir li jsejjaħ il-Laqgħa Straordinarja fi żmien ħmistax-il (15) ġurnata minn meta tkun ippreżentata t-talba.

10.7      Avviż tal-Laqgħat Ġenerali għandhom jiġu mħabbra lis-soċi mhux żnqas minn sebat (7) ijiem qabel permezz ta’ avviż fin-notice board tal-każin u permezz ta’ ċirkulari lis-soċi u bandisti. Iċ-ċirkolari m’għandhomx jaslu akar tard minn tlett (3) ijiem qabel il-ġurnata tal-Laqgħa Ġenerali.

10.8      F’każ ta’ urġenza, il-President għandu d-dritt li jnaqqas iż-żmien tal-avviż minn dak stipulat f’Artiklu 10.7.

10.9      Jekk fil-ħin avżat għal-Laqgħa ma jkunx hemm kworum, il-President jista’ jipposponi l-Laqgħa għal nofs siegħa wara, jew għal jum ieħor, u hemm il-Laqgħa ssir bil-membri preżenti.

10.10   Kull deċiżjoni għandha tittieħed b’maġġoranza ta’ voti b’turija tal-idejn jew b’vot sigriet jekk dan jintalab imqar minn soċi wieħed.

10.11   Min ikun qed jippresiedi, ma jistax jivvota ħlief meta l-għadd tal-voti jiġi ndaqs.

10.12   Kull emenda għall-Istatut trid tgħaddi mil-Laqgħa Ġenerali.

10.13   Biex wiehed jinhatar f’kariga onorarja, irid jghaddi mill-laqgha generali annwali, u jrid jigi konfermat f’ kull laqgha Generali Annwali.

10.14   Jekk mozzjoni jew proposta miġjuba f’Laqgħa Ġenerali ma tgħaddix, din ma tistax terġa’ titressaq qabel tgħaddi sena.

11. Kummissjonijiet / Fergħat

11.1      Fl-Għaqda tagħna jeżistu ħames (5) Kummissjonijiet / Fergħat, li huma:

11.1.1    Fergħa Nisa

11.1.2    Kummissjoni Nar u Armar

11.1.3    Kummissjoni Żgħażagħ Bajdisti

11.1.4    Kummissjoni Planċier

11.1.5    Kummissjoni Banda.

11.2      Il-Kumitat jaħtar Kummisjonijiet / Fergħat skont il-ħtieġa. Il-membri ta’ dawn il-Kummissjonijiet / Fergħat jistgħu jintagħżlu kemm minn fost il-membri tal-Kumitat kif ukoll minn membri effettivi jew imħalltin.

11.3      Persuni li jixtiequ jiffurmaw parti mill-Kummissjonijiet / Fergħat għandhom jimlew applikazzjoni meta jkun hemm is-sejħa u din trid tiġi approvata mill-Kumitat Ċentrali.

11.4      Biex persuna tagħmel parti minn Kummissjoni / Fergħa jrid ikollha mhux anqas minn sittax-il (16) sena.

11.5      Meta membru f’Kummissjoni / Fergħa jagħlaq it-tmintax-il (18) sena, isir awtomatikament membru skont Artiklu 6.1 tal-istatut mingħajr il-ħtieġa li jerġa’ jiġi approvat mill-Kumitat. B’danakollu huwa jibqa’ wkoll membru fil-Kummissjoni / Fergħa.

11.6      Il-Kummisjonijiet / Fergħat jistgħu jorganizzaw laqgħat u attivitajiet bl-approvazzjoni tal-Kumitat !entrali minn qabel. Għandhom ukoll jamministraw il-finanzi tagħhom. Is-Segretarju Finanzjarju huwa fid-dover li jissorvelja u jżomm b’regolarita reġistru li juri d-dħul u l-ħruġ tal-flus ta’ kull Kummissjoni / Fergħa skont Artiklu 4.3.5 ta’ dan l-Istatut.

11.7      Il-finanzi tal-Kummissjonijiet / Fergħat jinżammu f’kont bankarju separat, iżda kull żbank irid ikun iffirmat minn żewġ Uffiċjali tal-Kumitat Ċentrali.

11.8      Il-Kummissjonijiet / Fergħat fi ħdan din l-Għaqda huma marbuta li jaħdmu id f’id mal-Kumitat Ċentrali.

11.9      Il-President tal-Kumitat Ċentrali għandu d-dmir li jissorvelja t-tmexxija ta’ kull Kummissjoni / Fergħa. Għandu d-dritt ukoll li jeżamina kotba tas-Segretarju u l-Kaxxier tal-Kummissjoni / Fergħa u kwalunkwe dokument relatat mal-Kummissjoni / Fergħa.

12.   Il-Bar

12.1      Il-każin għandu jkollu bar li jkun fornit b’affarijiet ġenwini u prezzijiet moderati.

12.2      Il-bar jittieħed bl-offerta skont il-kundizzjonijiet li jagħmel il-Kumitat.

12.3      Il-kundizzjonijiet tal-offerta tal-bar iridu jiġu esponuti fuq in-notice board mill-anqas ħmistax-il (15) ġurnata qabel ma jagħlqu.

12.4      Il-Kumitat ikollu u jżomm id-dritt li jirrifjuta kwalunkwe offerta mingħajr ma jagħti raġuni, anke jekk din tkun l-aktar waħda vantaġġjuża.

12.5      Il-Kerrej li jingħata l-bar irid jiffirma s-sett ta’ regolamenti li fuqhom tkun intefgħet l-offerta, u għall-ebda raġuni ma jistgħu jinkisru.

12.6      F’każ ta’ ksur ta’ regolamenti min-naħa tal-Kerrej, il-Kumitat għandu d-dritt li jtemm il-kuntratt.

12.7      F’każ li ma jkun hemm l-ebda offerta jew l-offerti li jintefgħu ma jkunux sodisfaċenti, il-Kumitat iżomm id-dritt li jmexxi l-bar hu għal perjodu ta’ mhux aktar minn sitt (6) xhur u fl-istess ħin għandha tinħareġ offerta oħra għall-kirja tal-bar.

13.   Ġurnali, Petizzjonijiet u Morali Pubblika

13.1      Il-Kumitat Ċentrali biss jista’ jiddeċiedi liema perjodiċi jew gazzetti għandhom jidħlu fil-każin.

13.2      L-Għaqda m’għandhiex tiġi attribwita ma’ xi kulur politiku. Ħadd ma jista’ jesponi materjal politiku fil-bini tal-Għaqda.

13.3      Hija projbita kwalunkwe petizzjoni, kontribuzzjoni, lotterija jew affarijiet oħra bħal dawn mingħajr permess tal-Kumitat.

13.4      Kliem jew għemil li jweġġa’ lill-morali pubblika jew lir-Reliġjon huma assolutament ipprojbiti.

13.5      Ebda logħob tal-azzard m’hu permess fil-bini tal-każin.

14.   Passi Dixxiplinarji

14.1      Il-Kumitat Ċentrali għandu d-dritt li jieħu passi dixxiplinarji kontra kull soċi li jonqos mid-doveri tiegħu / tagħha lejn l-Għaqda.

14.2      Il-Kumitat Ċentrali jista’ jieħu passi dixxiplinarji kontra kull bandist li jonqos mid-dover tiegħu / tagħha lejn l-Għaqda jew lejn il-Banda.

14.3      Il-Kumitat Ċentrali jista’ jieħu passi dixxiplinarji kontra s-Surmast, Assistent Surmast jew l-Għalliema tal-Allievi jekk dawn jonqsu mid-doveri tagħhom lejn l-Għaqda, lejn il-Banda jew bandisti / allievi.

14.4      Il-Kumitat Ċentrali jista’ jieħu passi dixxiplinarji kontra kull membru tal-Kumitat u / jew tal-Kummissjonijiet jekk jonqsu mid-doveri tagħhom lejn l-Għaqda.

14.5      Il-Laqgħa Ġenerali tista’ tieħu passi dixxiplinarji kontra l-Uffiċjali tal-Kumitat Ċentrali jekk jonqsu mid-doveri tagħhom lejn l-Għaqda jew lejn il-Banda. F’dan il-każ, għandu jinħatar Bord tad-Dixxiplina magħmul minn tliet (3) membri effettivi waqt l-istess Laqgħa Ġenerali biex janalizzaw il-każ u l-passi dixxiplinarji li għandhom jingħataw.

14.6      Il-passi dixxiplinarji li jista’ juża l-Kumitat Ċentrali / Bord tad-Dixxiplina huma: twiddiba, sospensjoni jew tħassir minn membru, kemm jekk ikun bandist kif ukoll jekk ikun membru sussidjarju.

14.7      Il-perjodu tas-sospensjoni jiġi deċiż mill-Kumitat Ċentrali / Bord tad-Dixxiplina u jkun komparabbli man-nuqqas li jsir.

14.8      Kull bandist jew membru sussidjarji li ismu jitħassar mil-lista tal-bandisti / membri sussidjarji, ma jistax jerġa’ jiġi mdaħħal lura fl-Għaqda qabel ma tgħaddi sena. Wara dan il-perjodu, ikun irid jagħmel dikjarazzjoni jew apoloġija bil-miktub. Din trid tkun tissodisfa lill-Kumitat Ċentrali.

14.9      F’każ ta’ diżordni fil-każin minn xi membru sussidjarju jew individwu, kull membru fil-Kumitat huwa fl-obbligu li jirraporta mill-aktar fis lill-President jew lis-Segretarju Eżekuttiv.

14.10   Ebda persuna ma tista’ tiffrekwenta l-każin jekk ma tkunx soċi jew akkumpanjata minn soċi. Jekk persuna ma tkunx soċi, xorta wahda trid tobdi u timxi skond l-Istatut waqt li qiegħdha fil-bini tal-każin.

14.11   Il-Kumitat Ċentrali / Bord tad-Dixxiplina għandu s-setgħa li jikkastiga lil kull individwu fin-nuqqas tiegħu, jekk dan, wara li jkun mgħarraf, ma jidhirx quddiem il-Kumitat / Laqgħa Ġenerali mingħajr ma  jkollu raġuni valida.

15.   Żwieġ

15.1      Meta xi membru sussidjarju / bandist jiżżewweġ, titla’ kuruna fil-jum tat-tieġ, jekk il-Kumitat ikun mgħarraf minn qabel.

16.   Viżtu

16.1      F’każ ta’ mewt ta’ membru tal-Kumitat Ċentrali jew ta’ xi bandist, il-każin jingħalaq fuq nofs bieba.

16.2      F’każ  li jseħħ Artiklu 16.1, il-bandiera tal-Għaqda titla’ mezz’asta għal tlitt (3) ijiem u l-katavru jiġi akkumpanjat mill-membri tal-Kumitat, Kummissjonijiet / Fergħat, mill-Banda bl-istandard u kuruna flimkien mal-membri.

16.3      F’każ li jseħħ Artiklu 16.1, il-Banda ddoqq fil-funeral jekk il-familja tkun trid. F’dan il-każ, għandhom jintbagħtu ċirkolari lis-soċjetajiet mużikali kollha fejn issirilhom talba biex jakkumpanjaw fil-funeral bl-istandard tal-Għaqda tagħhom.

16.4      F’każ li jseħħ Artiklu 16.1, u fi żmien 3 (tliet) xhur il-banda jkollha Programm, il-bandisti jilbsu mustaxija sewda u jżommu minuta silenzju qabel ma jibda l-Programm fuq il-planċier.

16.5      F’ każ ta’ mewt ta’ membru sussidjarju, jitla’ ċoff iswed mezz’asta sakemm issir id-difna.

16.6      F’każ ta’ mewt ta’ qraba ta’ membri sussidjarji, jitla’ ċoff iswed mezz’asta għal ġurnata. Il-qraba huma l-ġenituri, l-aħwa, l-ulied ‘il fuq minn seba’ (7) snin,  u l- mara / raġel f’każ ta’ miżżewġin.

16.7      Il-Kumitat għandu jiġi mgħarraf mill-familja tal-mejjet.

16.8      F’każ ta’ mewt ta’ persuna prominenti lokali jew Nazzjonali, titla’ bandiera ta’ Malta mezz’asta sakemm jindifen.

16.9      Jekk il-Kumitat ma jiddeċidix mod ieħor, ebda vistu ma jista’ jsir fil-ġranet tal-Ħadd, Festi Pubbliċi u fi ġranet oħra li jidhirlu l-Kumitat.

16.10   F’kaz ta’ mewt ta’ persuna Ekkleżjastika, titla’ l-bandiera ta’ Malta mezz’asta sakemm issir id-difna.

16.11   Tinżamm lista ta’ dawk il-membri / bandisti jew qrabathom li jmutu matul is-sena u f’Novembru tintbagħat ċirkulari lill-familji ta’ dawk li jkunu mietu, fejn jiġu mgħarrfa li se ssir quddiesa kantata b’sufraġju għal ruħhom.

16.12   Kull membru / bandist jista’ jindifen fl-oqbra tal-Għaqda.

16.13   Fix-xahar ta’ Novembru, l-Għaqda tagħmel offiċjatura għal ruħ il-membri / bandisti mejta, u l-membri kollha huma fid-dover li jattendu għal din iċ-ċerimonja.

17.   Regolamenti dwar l-Oqbra

17.1    L-Għaqda għandha tliet (3) oqbra numru 584 / 585 / 586 fiċ-Ċimiterju tal-Madonna tal-Ħniena ġewwa Ħaż-Żabbar fejn fihom jistgħu jiġu midfuna l-bandisti u l-membri sussidjarji. Biex il-bandisti u l-membri sussidjarji jkollhom id-dritt li jindifnu f’dawn l-oqbra, jeħtieġ li josservaw dawn ir-regolamenti:

17.1.1       Il-membri jeħtieġu li jkunu ilhom membri regolari tal-Għaqda mhux anqas minn għaxar (10) snin. Jekk membru jkun ilu anqas minn dan il-perjodu, id-differenza tal-ħlas tal-menswalita` trid tiġi mħallsa mill-familjari.

17.1.2       Il-membri ma jistgħux ikunu lura fil-menswalita` iżjed minn sitt (6) xhur.

17.1.3       L-Allievi jeħtieġ ikunu ilhom iżjed minn sena (1) jistudjaw mal- Għaqda.

17.1.4       Jistgħu jiġu midfuna dawk I-bandisti li kawża ta’ sahhithom ma jkunux qegħdin jaqdu lill-Banda.

17.1.5       Iċ-ċertifikat tal-mewt ikun fih muri illi l-qabar ikun jista’ jinfetaħ wara sena mid-difna.

17.1.6       F’każ li l-oqbra ma jkunux jistgħu jinfetħu iżjed minn sena minħabba regolamenti sanitarji, il-familja tal-mejjet ikollha d-dritt li titrasporta il-katavru wara li jagħlaq iż-żmien iffissat għas-spejjeż tagħha.

17.1.7       L-ispejjeż tad-difna jkunu mħallsin mill-familjari.

17.1.8       Il-familja tal-mejjet imsieħeb għandha tavża lis-Segretarju Eżekuttiv mal-mewt tiegħu, biex tkun tista’ tieħu l-permess biex tagħmel użu ta’ wieħed mill-oqbra.

17.1.9       Il-qraba ta’ min jindifen fl-oqbra tal-Għaqda ma jkollhom l-ebda jedd jitolbu lill-Għaqda biex twaħħal jew tikteb xi ħaġa proviżorja jew permanenti dwar min ikun indifen.

17.1.10     Il-Kumitat Ċentrali ma jerfa’ l-ebda responsabbilta għal xi ħsara jew serq ta’ xi oġġetti li jista’ jsir minn fuq l-oqbra.

17.1.11     F’każ li xi familjari jridu jitrasportaw xi fdalijiet ta’ qraba mseħbin, l-ispejjeż iridu jiġu mħallsa kollha mill-familjari.

18.   Jekk tinħall l-Għaqda

18.1      Din l-Għaqda ma tistax tinħall sakemm fiha membri skont ma tagħti l-liġi u li jriduha tibqa’ għaddejja mqar jekk f’xi Laqgħa Ġenerali l-maġġoranza tkun trid dan. Dawn il-membri għandhom jieħdu ħsieb huma biex jaħtru Kumitat ġdid u jsir kulma jkun meħtieġ u mitlub minn dan l-Istatut biex l-Għaqda tkompli.

18.2      F’każ ta’ xoljiment tal-Għaqda, ir-rigali u l-oġġetti kollha għandhom jitqiegħdu fil-pussess ta’ kuratur magħżul minn Laqgħa Ġenerali, bil-patt li jingħataw lura lill-Għaqda fil-każ li din terġa’ titwaqqaf. Id-dejn, jekk ikun hemm, jitħallas mill-bejgħ tal-għamara tal-każin. Jekk ikun hemm xi bilanċ, dan għandu jitqiegħed il-bank.

18.3      Jekk jinħatar Kumitat ġdid u jinżamm l-istess isem ta’ Għaqda Madonna tal-Grazzja Banda San Mikiel Żabbar A.D.1883, il-flus u l-affarijiet kollha jinġiebu lura mill-bank u jitqiegħdu mill-ġdid taħt il-kustodja tal-Għaqda.

18.4      Jekk wara li jgħaddu għaxar (10) snin mix-xoljiment tal-Għaqda, din ma tkunx reġgħet twaqqfet, il-propjeta` kollha tinbiegħ, u flimkien mal-flus l-oħra li jkun hemm fil-banek, jitqassmu lill-Istituti foqra ta’ Ħaż-Żabbar u jinqasmu skont il-ħtieġa li jkunu jinsabu fih dak iż-żmien.

18.5      Kull propjeta`, kemm mobbli kif ukoll immobbli, iridu jiġu inventarjati minn persuna legali li tkun magħżula mil-Laqgħa Ġenerali mlaqqa’ apposta għal dan il-għan.

18.6      Kull propjeta`, kemm mobbli kif ukoll immobli, iridu jiġu stmati minn persuni professjonali qabel jinbiegħu u l-flus li jidħlu minnhom jinqasmu kif imsemmi f’Artiklu 18.4. Dawn il-persuni għandhom jiġu magħżula mill-Laqgħa Ġenerali mlaqqa’ għal dan il-għan u għal Artiklu 18.5.

19.   Għeluq

19.1    Sabiex kull regolament f’dan l-Istatut ikun jista’ jiġi emendat, miżjud, imnaqqas jew imneħħi għal kollox, irid jiġi approvat minn żewġ terzi (⅔) tal-membri regolari u bandisti preżenti waqt Laqgħa Ġenerali.

19.2    L-interpretazzjoni finali u deċiżiva ta’ kulma jingħad f’dan l-Istatut hija responsabbilta` biss tal-Kumitat Ċentrali.

19.3    Fejn ma jitkellmux ir-Regolamenti, jiddeċiedi l-Kumitat Ċentrali skont iċ-ċirkostanzi.

19.4    Kopja ta’ dan l-Istatut għandha tiġi mogħtija lill kull membru sussidjarju, bandist jew student tal-mużika tal-Għaqda Madonna tal-Grazzja Banda San Mikiel Żabbar A.D.1883.

TMIEM